حسب إحصائيات 2019 سوق القنّب تسوى 344 مليار دولار (بين السوق السوداء و المبيعات القانونيّة)
و كل ما يطلع أي ممثل عن الحكومة التونسية تسمع كان الهم و المشاكل على ميزانية البلاد و الميزيرية اللي عايشين فيها، تكمل تجي الكورونا تقطع أرزاق برشا عائلات و برشا صبحو بطّالة و الدولة لاهي قادرة تخدم ولادها و لاهي قادرة تقيّم إقتصادها، لهنا شنوا الحل اللي لقاه سيد رئيس الحكومة ؟ إنو يزيد يطبع أكثر فلوس، لكن البنك المركزي رفضلو الطلب و اللي هو قرار صائب علاش ؟ خاتر كيف نطبعو أكثر فلوس تصير حاجة إسمها التضخم المالي، الدولة تنجم بين ليلة و نهار تطبعلك برشا فلوس و توزعهم عالشعب، مثلا تعطي لكل مواطن مليار، أما المليار هءاكا يولي ما يشريلكش باكو دخان خاتر قيمة العنلة تزيد تطيح..
اليوم و نحنا نعيشو في أزمة (ذكرني وقتاش ما كنّاش نعيشو في أزمة ؟ جماعة في وقت بن علي كان خير أقعدو على جنب تو نحكي معاكم مرّة أخرى خاتر اللي عايشينو الكل جراير بن علي و اللي جاو بعدو كيفكيف)
و رغم الأزمات المتكررة هاذي اللي شدو الحكم الكل ما لقاوش حلول، الكلهم بالعين نفس المسجلة، نفس السيناريو يحكيو فيه غير الأرقام تتبدل (بالطبيعة مادام الإقتصاد قاعد يطيح) و نهايتها يخرج سيد رئيس الحكومة و يقلنا بكل صرامة إلبسو الكمامات باش تعيشو.
يا سيادة رئيس الحكومة، ياخي تشوف فينا عايشين ؟ سيبونا خلينا نموتو كيف ما حبيتوش تسمعونا..
كيف ثلنا سيبو الcannabis ماناش نطالبو باش كل مواطن يشد جونتة و يخرج بيها للشارع قال شنوا هكاكة تتصلح الأمور، هذا تتفيه للحملة
خاتر اليوم، و اللي يجهله العديد منكم (الجماعة اللي كروشهم دازّة و لابسين كرافاتات و شادين البيروات)
إنو الcannabis ماعادش حاجة يخافو منها العباد (على أساس قبل 1920 كانو يخافو منها..) و بالعكس ولاو يعملو في تجارب، لقاو إنها نبتة بخلاف إنو كيف تتكيفها ما تردكش عنيف، ما تظرش البدن كيما الدخان، الكحول، المواد السكرّية و غيرو من المواد العادية اللي نستعملوها يوميا و تبيعلنا فيهم الدولة، و لقاو زادة إنها تنجم تكون علاج أساسي لعديد الأمراض، و علاج ثانوي لأمراض أخرى،
نزيدك زيادة، لقاو إنو النبتة هاذي عندها جانب صناعي زادة، ما يخفاش عليك إنو فرنسا هي ثالث أكثر دولة تعتمد على الصناعات بالChanvre (hemp, تكروري، قنّب صناعي، كيما تحبو تسميوه)
و ما يخفاش عليك زادة إنو الصين و كندا سبقوها في الأرقام، لكن الدول هاذي نجمو نفوتوها، تعرف علاش ؟ خاتر أولا عندنا المناخ الملائم، و عندنا أكثر من 600 ألف هكتار من الأراضي الغير مزروعة، و عندنا زادة الشباب البطّال، و عندنا الإقتصاد اللي طايح، و عندنا معامل تجيب في المواد الأوليّة مالخارج، و ما عندنا في الExport كان الزيت و شويا تفاتف ما يغطيوش ال import متاعنا (ما تستحقش نفسرلك إنو هذا يعمل عجز في الميزان التجاري و يخلي العملة متاعنا ما عندهاش قيمة و يخلينا نصرفو برشا عملة صعبة)
كان نزيد نقلك إنو النبتة هاذي تعطيك مادّة أولية لأكثر من 25000 منتوج، ما ينجمش هذا يعاون إنو إقتصادنا يولي يعمل أكثر على الصناعات و الفلاحة في بلاصة السياحة اللي تجيبلنا في زوز سوردي ؟
(الإقتصاد التونسي :
agriculture: 10.1%; industry: 26.2%; services: 63.8%)
سيدي رئيس الحكومة، أيها السادة المسئولين، ماكمش على رأس الدولة باش تقعدو تقولولنا اللي نحنا عندنا عجز و إقتصادنا طايح، إنتوما موجودين باش تلقاو حلول، لكن فشلتو في هذا، و اليوم نحنا قاعدين نقولولكم اللي عندنا نحنا الحلول، و من حقنا نعيشو في بلاد يكون عندها مستقبل.
نحيو من مخاخكم فكرة الزطلة و إسجا أسمعنا شنوا نجمو نقولولكم عالcannabis،
ولاد بلادنا بالآلاف قاعدة تحرق خاتر نتوما فشلتو باش توفرولهم العيش الكريم، و نذكرك إنو الشعب له الحق في تقرير مصيره، لكن بمناهجكم إنتوما قاعدين تقررولنا في مصير أسود و موطن لا يحلو فيه العيش.
سيبونا نحكمو في بلادنا و خليونا نبنيوها و كونو متأكدين إنو نحنا لا نحبو الشر لرواحنا و لا نحبو الشر لبلادنا، و السلام.
Les sources :
