من المواضيع اللي تدعّم تقنين القنّب، و خصوصا القنّب الصناعي، نطرح عليكم اليوم موضوع إستخراج مواد بناء من القنّب اللي كانو جدودنا الأمازيغ يستعملوه زادة في صنع الملابس و زرابي و هذا اللي تواصل حتى لسنة 1953 لحد ما الإحتلال الفرنسي منع زراعتو، رغم إنو فرنسا تعتمد على الصناعات بالقنّب و هي ضمن الأربعة الدول الأولى في زراعة القنّب الصناعي إلا إنو تونس لا زال يحكمها القانون اللي فرضتو فرنسا في الخمسينات.
-
شنوى هو القنّب الصناعي (hemp)؟
هو شتلة من القنّب، من عائلة الSativa و عنصر الTHC موجود فيها بنسبة صغيرة أقل من 0.3% يعني ما تعطيش نشوة و ماعندهاش نفس التأثير اللي يعملو القنّب الترفيهي.
كان مستعمل منذ قديم العصور، في برشا حضارات،
و حتى في تونس ماهوش غريب علينا،
عندو برشا إستعمالات، سابقا كانو يستعملوه في إستخراج المادة الأوّلية باش يصنعو منها حوايج و صناعات النسيج بصفة عامّة، و حاليا فما أكثر من 25,000 منتوج يمسو 9 مجالات صناعية نجمو نتحصلو عليهم عن طريق المواد الأولية اللي يوفّرهم القنّب الصناعي.
تم منع زراعة القنّب أول مرّة في تونس سنة 1953، يعني وقت الإستعمار، لكن السؤال اللي نطرحوه اليوم، علاش تم منع الزراعة في تونس وقتلي فرنسا اليوم من أكثر 4 دول في العالم إستعمالا للقنّب الصناعي في صناعاتها؟
Source : statista.com
فين نجمو نستعملو القنّب الصناعي ؟
برشا مجالات و صناعات اليوم نجمو نستغلو فيها القنّب الصناعي، كيما صناعات النسيج، صناعة الورق، مواد غذائية، مواد مكتبية، مواد تجميل، مواد بلاستيكية و غيرها من المجالات.
علاش هو خيار ؟ خاتر مثلا بلادنا ما تعتدمش على الصناعة في مجالاتها و حتى كان نحبو نعتدمو عليها ما عناش الموارد و المواد الأولية، اللي باش يخلينا نستغلوهم، يعني حتى في كان باش نعتمدو على الصناعة، باش نتلزو نشريو المواد الأولية من بلدان أخرى و هذا اللي باش يخلي التكلفة متاع المواد التونسية تغلى.
غير هذا، الدول اللي تعتمد على الصناعات بالقنّب موش الكلها عندها نفس المناخ متاعنا، هذا اللي يخلينا ندخلو فب منافسة عندنا فيها الأفضلية و يولي إقتصادنا قائم موش كان على السياحة لكن حتى على الصناعة و موش على السوق المحليّة فقط، لكن نتفتحو على أسواق العالم و نوليو نصدرو في برشا مواد موش كان الزيت و الدقلة و شويا مواد فلاحية و صناعات تقليدية.. و هذا بدورو باش يخلي الدينار يطلع خاتر باش تولي فما أكثر عملة صعبة داخلة للبلاد و اللي باش يخلي قيمة الدينار تطلع مقارنة مع العملات الأجنبية.
إستعمال القنّب الصناعي في صناعات مواد البناء
Hempcrete
قلنا إنو برشا مواد يمكن إستغلال القنّب الصناعي كمادّة أولية لصناعتها، من جملة المواد هاذب نلقاو مواد بناء،
يقول القايل عمركشي ريت إنسان شادد ياجورة يتكيف فيها باش يشيخ ؟ مالا علاش منع إستغلال المواد هاذي خصوصا إنو القانون التونسي يمنع إستغلال القنّب دون تمييز.
Source : الرائد الرسمي للجمهورية التونسية عدد 033 لسنة 1992
http://www.legislation.tn/sites/default/files/journal-officiel/1992/1992A/Ja03392.pdf
زعما شنوا اللي يخلينا نسيبو المواد اللي نستعملو فبها حاليا و نبدلوها بمواد مستخرجة من القنّب ؟
خاتر إستعمال المواد هاذي فب بناء المنازل يخلينا نساهمو في تقليص الغازات المنبعثة للأوزون،
و هو عازل للحرارة يعني يعدل الحارارة من دون مكيّفات للهواء، يمتص الرطوبة و ما يعملش اللي نسميوه بلغتنا “الندى”، و على عكس الحطب، ما يشعلش بالنار، مقاوم للزلازل خاتر طريقة تكوينو تخليه ما يتكسرش وقت الحركة، وأهم حاجة مادة من الطبيعة و صديقة للطبيعة، إستخراجها يتطلب زراعة و بالطريقة هاذي نكونو مسينا زوز مجالات اللي هوما الزراعة و الصناعة و خدمنا برشا عباد، و التكلفة رخيصة و ما تاخوش برشا وقت.. هذا الكل و مزالو فما عباد ماتساندش شرعنة القنّب الصناعي ؟
مواد البناء هي ميدان واحد من برشا ميادين أخرين نجمو نستغلوهم كان نحلو الباب للمجال الصناعي، اللي هو زادة ما يمثلش مشكل خاترها نبتة موش مخدرة، مافيهاش نفس الخصائص اللي في القنّب الهندي و ما تنجمش تستهلكها كمادّة مخدرة و توا نخليوكم مع شويا صور للبناء بإستعمال ال
Hempcrete
